જેના માટે બાંગ્લાદેશે ભારત સાથે સબંધ બગાડ્યો તેને જ બાંગ્લાદેશને સાથ ન આપ્યો

જેના માટે બાંગ્લાદેશે ભારત સાથે સબંધ બગાડ્યો તેને જ બાંગ્લાદેશને સાથ ન આપ્યો

World News: બાંગ્લાદેશના રુપપુર ન્યુક્લિયર પાવર પ્લાન્ટ માટે રશિયાથી આવનારી ન્યુક્લિયર ફ્યુઅલની શિપમેન્ટ એરસ્પેસ ક્લિયરન્સના મુદ્દે અટકી ગઈ છે. 24 સપ્ટેમ્બરે બાંગ્લાદેશ પહોંચવાનું નક્કી થયેલું કાર્ગો વિમાન સમયસર ઢાકા પહોંચી શક્યું નહોતું. બાંગ્લાદેશના અધિકારીઓના જણાવ્યા અનુસાર, વિમાનને પાકિસ્તાનના એરસ્પેસમાંથી પસાર થવા માટે જરૂરી મંજૂરી મળી નહોતી.

આ ઘટનાને કારણે રુપપુર ન્યુક્લિયર પાવર પ્લાન્ટ માટેની ફ્યુઅલ ડિલિવરીનું શેડ્યૂલ આગળ ધકેલાયું છે. હવે રશિયાની સરકારી ન્યુક્લિયર કંપની Rosatomએ ઓક્ટોબરથી શિપમેન્ટ શરૂ કરવાની માહિતી આપી છે.

24 સપ્ટેમ્બરે પહોંચવાનું હતું યુરેનિયમ

બાંગ્લાદેશના વિજ્ઞાન અને ટેક્નોલોજી મંત્રી ફકીર મહબૂબ અનમે જણાવ્યું હતું કે રુપપુર પ્લાન્ટ માટે યુરેનિયમ લઈને આવતું કાર્ગો વિમાન 24 સપ્ટેમ્બરે બાંગ્લાદેશ પહોંચવાનું હતું.

ઢાકા એરપોર્ટ પર વિમાનના આગમનની તમામ તૈયારીઓ પૂર્ણ કરવામાં આવી હતી. જોકે વિમાન ન પહોંચતાં અધિકારીઓએ Rosatomના સંપર્ક અધિકારી પાસેથી માહિતી મેળવી હતી. ત્યાંથી એરસ્પેસ ક્લિયરન્સ ન મળ્યાની જાણકારી મળી હતી.

પાકિસ્તાને શા માટે મંજૂરી ન આપી?

આ મામલે શરૂઆતમાં બાંગ્લાદેશના અધિકારીઓ ચોક્કસ કારણ જણાવી શક્યા નહોતા. કેટલાક અહેવાલોમાં પાકિસ્તાન તરફથી ઓવરફ્લાઇટ પરમિશન ન મળ્યાનું જણાવાયું છે.

બીજી તરફ, પાકિસ્તાન તરફથી આ મુદ્દે ટેકનિકલ અને નિયમનકારી પ્રક્રિયાનો ઉલ્લેખ કરવામાં આવ્યો છે. તેથી મંજૂરી ન મળવા પાછળનું ચોક્કસ કારણ અને તેની રાજકીય પૃષ્ઠભૂમિ અંગે સત્તાવાર રીતે સંપૂર્ણ સ્પષ્ટતા હજુ થઈ નથી.

હવે ઓક્ટોબરમાં આવશે ન્યુક્લિયર ફ્યુઅલ

શિપમેન્ટમાં વિલંબ થયા બાદ રશિયાએ નવી સમયસીમા નક્કી કરી છે. Rosatomના જણાવ્યા અનુસાર રુપપુરના બીજા યુનિટ માટેની ન્યુક્લિયર ફ્યુઅલ ડિલિવરી ઓક્ટોબરથી શરૂ થઈને ડિસેમ્બર સુધી ચાલુ રહેવાની છે. બાંગ્લાદેશી અધિકારીઓએ પણ ઓક્ટોબરના પ્રથમ સપ્તાહમાં નવી શિપમેન્ટ આવવાની માહિતી આપી છે.

અહેવાલો અનુસાર, મૂળ રૂટમાં રશિયાથી બાંગ્લાદેશ સુધી પહોંચવા માટે અનેક દેશોના એરસ્પેસનો ઉપયોગ થવાનો હતો. તેથી એક દેશની ઓવરફ્લાઇટ ક્લિયરન્સમાં વિલંબ થાય તો સમગ્ર ફ્લાઇટ શેડ્યૂલ અસરગ્રસ્ત થઈ શકે છે.

શું રુપપુર ન્યુક્લિયર પ્રોજેક્ટ અટકી જશે?

હાલના અહેવાલો મુજબ આ વિલંબથી રુપપુર પ્રોજેક્ટના સમગ્ર કામ પર તાત્કાલિક અસર થવાની શક્યતા દર્શાવવામાં આવી નથી. પ્રોજેક્ટના અધિકારીઓએ પણ ફ્યુઅલ સપ્લાયને ફરી શેડ્યૂલ કરવાની પ્રક્રિયા શરૂ કરી છે.

રૂપપુર બાંગ્લાદેશનો પ્રથમ ન્યુક્લિયર પાવર પ્લાન્ટ છે. રશિયાની Rosatomની ટેક્નોલોજી અને સહાયથી અહીં બે VVER-1200 રિએક્ટર બનાવવામાં આવી રહ્યા છે. બંને યુનિટની સંયુક્ત ક્ષમતા આશરે 2,400 મેગાવોટ છે.

અગાઉ પણ આવી હતી ન્યુક્લિયર ફ્યુઅલની પ્રથમ ખેપ

રૂપપુર પ્લાન્ટ માટે ન્યુક્લિયર ફ્યુઅલની અગાઉની ખેપ રશિયાથી બાંગ્લાદેશ પહોંચી ચૂકી છે. તે સમયે ફ્યુઅલને ઢાકા એરપોર્ટથી કડક સુરક્ષા વચ્ચે પ્લાન્ટ સુધી પહોંચાડવામાં આવ્યું હતું.

હવે નવી શિપમેન્ટ ઓક્ટોબરમાં શરૂ થવાની જાહેરાત બાદ નજર એ વાત પર રહેશે કે રશિયા કયા રૂટથી ફ્યુઅલ બાંગ્લાદેશ પહોંચાડે છે અને એરસ્પેસ ક્લિયરન્સની સમસ્યા ફરી સર્જાય છે કે નહીં.